In hmun lo ram teh tur Private firm-te Revenue Dept. in agreement siam pui

by Editor

Tualchhung News

ZORAM TODAY| 26th August, 2024 (Mon) : Minister, Land Revenue & Settlement Department B. Lalchhanzova chuan vawiin khan a pisaah Land Survey leh Demarcation chungchanga Department-a technical officers leh Staff te indaih lohna avanga Mizoram mipuite harsatna tawhte sutkianna turin Empanelled Land Survey Firm Official-te a ko khawm a. He hunah hian Sorkar lama Department aiawhin Dr. H. Lalthlangliana, Secretary, Land Revenue & Settlement Department leh Land Survey Firm official ten Minister hma-ah 'Deed of Agreement' ah hming an ziak (signed) a ni.

Tun Sorkar tharah Land Survey Firm 16-te Empanelment siam a ni a. Heng empanelled Survey firm-te hian a taka hna thawk thei turin Sorkar nen 'Deed of Agreement' an siam fel tawh a ni.

B. Lalchhanzova, Minister, Land Revenue & Settlement Department chuan Mizoram-ah danglamna (change) a awm theih nan te, ram mamawh leh ram kaihhnawiha harsatna tam tak chinfel a nih theih nan te, sorkara hnathawktu Surveyor indaih lohna avanga mipuite harsatna tawhte sutkian zel tum a nih thu sawiin Survey Firm-te hnenah duhsakna a hlan a. Sorkar mit tlung taka an hna thawk tur leh Land Survey kalpui tur te, mipuite harsatna hrethiam a, zaidam leh hawihhawm taka dan hnuaia hna thawk turin a chah a ni.

Land Survey Firm-te hi Orientation Training pek an ni ang a; Orientation Training paltlangte hnenah danin a tuk angin Land Survey Licence pek an ni ang. He inremna thuthlung-ah hian Sorkara Land Revenue & Settlement Department hriatpuina leh phalna hnuaiah Land Survey Firm leh mipuiten awlsam zawka ram Survey leh Demarcation an kalpui theihna turte ruahman a nih tur thu vawiina sorkar thuchhuah chuan a tarlang.